Terminal thar tur hi Kum hnih chhunga sak zawh tura ruahman niin sak zawh a nih hunah felfai zawka kal an beisei thu Northeast Frontier Railway hotute chuan an sawi. 

Home Minister K.Sapdanga chuan Guwahati leh Aizawl inkar Rail-in Sairang station a thlen hun lai ngeia Inner Line Permit pek chhuah dan leh passenger te harsatna a hmun ngeia hmuhpui a duh a thu a sawi. 

ILP siam ngai leh tualchhung mi passenger te chhuahna gate awm kawp chu a hrang ve vein a chhuahna gate ni hnih chhung ngeia siam zo nghal turin thutlukna siam a ni a. ILP nei lo tlanchhiate pawh umzui zel a ni a, thawn haw nghal zel an ni bawk. 

ILP hi online portal atanga siam theih ni mah se passenger tam takin an fill up thiam loh avangin Rail chhungah passenger te an awm laia ILP siamna form, Hard Copy an fill up theih dan tur ruahman mek a ni bawk. 

Vawiina Home Minister in a tlawh lai hian Guwahati to Sairang Rel-a chuang zingah ILP siam ngai leh tualchhung mi an inzat thuak a, Mizoram rawn tlawh zawk, tlai lama Guwahati Rel Service-a haw leh nghal tur engemawzah an awm bawk, niin ZPM thuchhuah chuan a tarlang.

Home Minister chuan, "Kan ram dinhmun te, kan hnam population-te en hian inthlahdah a thiang lova, ILP khauh lehzuala kenkawh a nih theihna atan zirlai pawl, khaw hrang hranga khawtlang hruaitute leh Branch YMA tin te thawhhopuiah ka sawm a, kan theihna zawnah theuh hmala turin ka ngen a ni," a ti.